මෝටර් රථ රැගත් තවත් විශාල නෞකාවක් කොළඹ වරායට පැමිණියා. ඒ මෝටර් රථ 1539 ක් සමග. ඉන්දියාවේ ඉනෝරා වරායේ සිට එම නෞකාව පැමිණ තිබෙනවා. මෙය මෝටර් රථප‍්‍රවාහනය සදහාම යොදාගන්නා නෞකාවක්. ශ‍්‍රි ලංකා වරාය අධිකාරියේ ඊ සී ටී පර්යන්තයේ නැංගුරම්ලා ගතකළ පලමු වාහන නෞකාව මෙයයි.
වියළි කාලගුණයෙන් දිස්ත‍්‍රික් හයකට බලපෑම් එල්ල වුණා. බොහෝ පිරිසකට පානීය ජල ගැටලු ද මතුව ඇති බවයි ආපදා කලමනාකරණ මධ්‍යස්ථානය ප‍්‍රකාශ කළේ. ගැටලුව විසඳීමට හැකි සෑම ක‍්‍රියාමාර්ගයක්ම ගෙන ඇති බව එම මධ්‍යස්ථානයේ සහකාර අධ්‍යක්ෂ ප‍්‍රදීප් කොඩිප්පිලි මහතා පැවැසුවා. පොළොන්නරුව, ත‍්‍රිකුණාමලය සහ කුරුණෑගල යන දිස්ත‍්‍රික්කයන්ට මෙම තත්වය වැඩි වශයෙන් බලපා තිබෙනවා. එම දිස්ත‍්‍රික්කයන්හි පවුල් විසිතුන් දහසකට වැඩි සංඛ්‍යාවකට ඉන් ගැටලු මතුව ඇති බවයි ආපදා කලමනාකරණ මධ්‍යස්ථානය සඳහන් කළේ. වනාන්තරවල ජීවත්වන සතුන් ද මහත් අසීරුතාවකට පත්ව ඇති බවයි පරිසරවේදීන් පෙන්වා දී ඇත්තේ.
සීමා නිර්ණය වාර්තාව පිළිබඳ අවසන් තීරණයට සර්ව පාක්ෂික සමුළුවක් පැවැත්වීමට රජය තීරණය කළා. ඒ සඳහා සියලු දේශපාලන පක්ෂවලට ආරාධනා කරන බවයි පළාත් පාලන අමාත්‍ය ෆයිසර් මුස්තාපා මහතා සඳහන් කළේ. ප‍්‍රජාතන්ත‍්‍රවාදය උපරිම ලෙස තහවුරු කිරීම එහි අපේක්ෂාවක්. සීමා නිර්ණ කමිටු වාර්තාව සැකසීම මේ වනවිට අවසන් අදියරේ පවතිනවා. එය සම්පූර්ණ කර ලබන 15 වන දා වනවිට වාර්තාව බාරදීමටයි කමිටුව සැලසුම් කර තිබෙන්නේ. ඉන්පසු සමුළුව පවත්වන දිනය තීරණය කරන බව අමාත්‍යවරයා ප‍්‍රකාශ කළා.
රජරට විශ්වවිද්‍යාලයේ කොටසක් අද(29) සිට වසා දැමීමට පියවර ගෙන තිබෙනවා. මිහින්තලය පරිශ‍්‍රයේ පවත්වාගෙන යන පීඨ තුනක් මෙලෙස වසා දැමෙන්නේ පවතින ජල හිඟය හේතුවෙන්. සමාජ විද්‍යා හා මානව ශාස්ත‍්‍ර, ව්‍යවහාරික විද්‍යා සහ කලමනාකරණ යන පීඨ දින නියමයක් නොමැතිව වසා දැමීමටයි විශ්වවිද්‍යාල පාලන අධිකාරිය තීරණය කළේ. කෙසේ වෙතත් විභාග කටයුතු නියමිත පරිදි පවත්වාගෙන යාමට තීරණය කර තිබෙනවා.
සංචාරක කර්මාන්තයෙන් ගමේ ජනතාවට වැඩි ප‍්‍රතිලාභ හිමිවිය යුතු බව අමාත්‍ය ජෝන් අමරතුංග මහතා පවසනවා. සුළු පරිමාණ කර්මාන්තකරුවන්ට සිය නිෂ්පාදන සංචාරකයින්ට අලෙවි කරගැනීමට අවස්ථාව ලබා දීම ද රජයේ අරමුණක්. විදේශ විනිමය ඉපැයීම් මෙන්ම අඩු ආදායම්ලාභී ජනතාවගේ ජීවන තත්වය ඉහළ නැංවීමට එය පිටිවහලක් ජෝන් අමරතුංග මහතා ප‍්‍රකාශ කළේ.සංචාරක ප‍්‍රවර්ධන නිලධාරීන්ට හැඳුනුම්පත් ලබා දීමේ උත්සවයකට එක්වෙමින් අමාත්‍යවරයා මේ බව සඳහන් කළා.
රටේ ආරක්ෂාව වෙනුවෙන් උපරිම කැපවීමෙන් කටයුතු කරන බව යුධ හමුදාපති ලුතිනන් ජනරාල් කි‍්‍රශාන්ත ද සිල්වා මහතා අවධාරණය කළා. රටේ ජනතාවගේ සහ දේපලවල ආරක්ෂාව වෙනුවෙන් කටයුතු කිරීමයි යුධ හමුදාවට පැවරී තිබෙන්නෙ. ඒ වෙනුවෙන් උපරිමයෙන් කි‍්‍රයාකරන බව යුධ හමුදාපතිවරයා මහනුවරදී මාධ්‍යවේදින් අමතමින් සදහන් කළා. යුධ හමුදාවේ 67වන සමරුවට සමගාමීව පූජනීය දළදා වහන්සේ වැඳපුදා ආශිර්වාද ලබාගැනීම පෙරවරුවේ සිදුවුණා. යුධ හමුදාවේ ධජ වලට ආශිර්වාද ලබාගැනිමත් එහි අරමුණක්. සෑම වසරකම යුධ හමුදා දිනය වෙනුවෙන් සිදුකෙරෙන වැඩසටහනේ පළමු අංගය දළදා වහන්සේගේ ආශිර්වාද ලබාගැනීමයි.
පළාත් සභා නියෝජිතයන් විදෙස්ගත වීමේදී අනිවාර්යයෙන් භාණ්ඩාගාර අනුමැතිය ලබාගත යුතු බව ජනාධිපති මාධ්‍ය අංශය සඳහන් කළා. පසුගිය වසර විස්සකට වැඩි කාලයක සිට පළාත් සභාවල මැති ඇමතිවරුන් රජයේ මුදලින් විදෙස්ගතවීම අඛණ්ඩව සිදුවී තිබෙනවා. මේ වනවිටත් මධ්‍යම පළාත් සභා මන්ත‍්‍රී කණ්ඩායමක් විදෙස් සංචාරයකට ගොස් සිටින බවයි වාර්තා වුණේ. මධ්‍යම පළාත් සභාවේ නියෝජිතයන් සඳහා විශාල මුදලක් වැයවීම සම්බන්ධයෙන් ජනාධිපතිවරයා දැනුවත් වී නොමැති බවත් නිවේදනයක් නිකුත් කරමින් ජනාධිපති මාධ්‍ය අංශය සඳහන් කළා. ලබන වසරේ සිට එවැනි අධ්‍යයන චාරිකා සඳහා පළාත් සභා නියෝජිතයන් විදෙස්ගත වීමේදී රාජ්‍ය භාණ්ඩාගාර අනුමැතිය ලබාගත වනවා. මේ වසරේ ඉදිරි කාලසීමාව සඳහා ද එය බලපැවැත්වෙන බවයි මාධ්‍ය අංශය පවසන්නේ.
රුසියාවේ හිටපු ශ්‍රී‍්‍ර ලංකා තානාපති උදයංග වීරතුංග අත්අඩංගුවට ගැනීම සදහා අන්තර්ජාතික පොලීසිය මගින් වරෙන්තුවක් නිකුත් කිරීම පිළිබද තීන්දුව ලබන සිකුරාදා(30) ප‍්‍රකාශයට පත්කෙරෙනවා. ඒ බව කොළඹ කොටුව මහේස්ත‍්‍රාත් ලංකා ජයරත්න මහත්මිය අද(26) කියා සිටියා. ශ්‍රී‍්‍ර ලංකා ගුවන් හමුදාවට මිග් යානා මිලදී ගැනීමේදී සිදුවූ බව කියන අක‍්‍රමිකතාවක් සම්බන්ධයෙන් උදය වීරතුංගට එරෙහිව නඩුව ගොනුකර තිබෙනවා. උදයංග වීරතුංග අධිකරණය මගහරිමින් විදෙස්ගතව සිටින බවයි භෙලිවුණේ. ඔහුට නොතීසි භාරදීමට උත්සාහ කලත් එය අසාර්ථක වූ බව පොලිස් මූල්‍ය අපරාධ විමර්ශන කොට්ඨාසය සදහන් කළා. විද්‍යුත් තැපෑල මගින්ද නොතීසි භාරදීමට උත්සාහ කර තිබුණා. මෙම සියලු අවස්ථාවල උදයංග වීරතුංග සිටින ස්ථානය තහවුරු කරගැනිමට නොහැකිවීම නිසා අන්තර්ජාතික පොලීසිය මගින් වරෙන්තු නිකුත් කිරීමටයි පොලිස් මූල්‍ය අපරාධ කොට්ඨාසය අධිකරණයෙන් ඉල්ලා සිටියෙ.
රුපියල් එක්කෝටි විසිතුන් ලක්ෂයක කේරල ගංජා කිලෝග‍්‍රැම් 82 ක් අත්අඩංගුවට ගැනීමට ආරක්ෂක අංශවලට හැකිවුණා. නාවික හමුදාව , පලෙයි පොලිසිය සහ මරදන්කර්නි පොලිසිය ඒකාබද්ධවයි වැටලීම සිදුකළේ. ඒ ඉන්දියාවේ සිට මුහුදු මගින් කේරල ගංජා ප‍්‍රවාහනය කරන බවට වෙත්තිලකේනි නාවික හමුදා කදවුරට ලැබුණු බුද්ධි තොරතුරකට අනුව. යාපනය මරදන්කර්නි මුහුදු තීරයේදී ආරක්ෂක අංශ දුටු ජාවාරම්කරුවන් කේරල ගංජා මුහුදට විසිකොට පළාගොස් තිබෙනවා. සැකකරුවන් සොයා පරික්ෂණ ක‍්‍රියාත්මක බවයි පොලිසිය සදහන් කළේ.
දිවයිනේ සියලු පලාත්වල ප‍්‍රජා ගුවන් විදුලි ස්ථාපනය කරන බව ජනමාධ්‍ය නියෝජ්‍ය අමාත්‍ය කරුණාරත්න පරණවිතාන මහතා ප‍්‍රකාශ කළා. ඒ සදහා අවශ්‍ය සංඛ්‍යාත ලබාදීමට ද කටයුතු කරන බවයි යෝජිත සබරගමු ප‍්‍රජා ගුවන්විදුලියේ ගොඩනැගිලි ප‍්‍රතිනිර්මාණය කිරීමේ අවස්ථාවට එක්වෙමින් නියෝජ්‍ය අමාත්‍යවරයා කියා සිටියේ. රුපියල් ලක්ෂ 250 ක වියදමනේ ප‍්‍රජා ගුවන්විදුලියක් ආරම්භ කිරීමට සබරගමු පලාත් සභාව පියවර ගෙන තිබෙනවා. රත්නපුර පුස්සැල්ල කළමනාකරණ හා පුහුණු මධ්‍යස්ථාන පරිශ‍්‍රයේ ගොඩනැගිලි ඒ සදහා යොදාගැනීමයි සැලසුම. මෙම ගුවන්විදුලි හා රූපවාහිනි මධ්‍යස්ථානයේ සේවය සදහා උපාධිධාරීන් ඇතුලු උසස් පෙළ සමත් තරුණ තරුණියන් 60 දෙනෙකු බදවා ගැනීමට ද පියවර ගැණුනා.